काठमाडौं– मधेस प्रदेश अहिले सुक्खाले ग्रस्त छ । वर्षा नहुँदा धान रोपाइँ हुन सकेको छैन भने खानेपानी अभाव पनि उत्तिकै छ । तराईमा पानीका स्रोत भनेका कुवा, इनार र चापाकल हुन् । यी तीनवटै परम्परागत प्रणाली बेकामे बन्दा पानी सङ्कट चुलिएको हो ।

खानेपानीको सङ्कट टार्न स्थानीय र प्रदेश सरकारले दमकल र ट्याङ्करबाट बस्तीबस्तीमा पानी बाँड्न थाले पनि त्यो त्यति प्रभावकारी भएको छैन ।

जसमध्ये महोत्तरी जिल्लाका विभिन्न नगरपालिकाका गाउँहरूमा खानेपानीको चरम अभाव देखिएको छ । जिल्लाको मनराशिसवा नगरपालिकामा रहेका दश वटा वडाका स्थानीयले अहिले खानेपानीको सङ्कट भोगिरहेका छन् ।

उक्त नगरपालिकाको वडा नम्बर १ मा अवस्थित चौरिया टोलका सबै चापाकल, इनार, कुवा सुक्दा स्थानीयहरू नगरपालिकाले वितरण गरेको ट्याङ्करको पानीको भरमा दैनिकी चलाउनु परेको स्थानीय राम प्रवेश महराले बताए । चापाकलमा पानी आउँदैन पानी पिउन खाना पकाउन पालिकाले बाँडेको पानीमा भर पर्नु परेको उनले सुनाए ।

कहिलेकाँही त पानी ल्याउने ट्याङ्कर रातिको ११–१२ बजे तिर आउँछ, फेरि त्यति बेला उठेर पानी भर्न पर्छ स्थानीय गगनदेव यादवले सुनाए ।

सोही नगरपालिकाको वडा नम्बर ५ मा रहेको जनता माध्यमिक विद्यालय क्षेत्र भित्रको डिपबोरिङ स्थानीयको लागि खुल्ला गरिँदा स्थानीयले केही राहत महसुस गरेका छन् ।

तस्बिरहरू : नेपाल फोटो लाइब्रेरी