दोलखा– भनिन्छ दशा बाजा बजाएर आउँदैन आखिर त्यस्तै भएको छ । अहिले जिरीका नुर्वु शेर्पाको परिवारमा । सामान्य रमाइलो गर्ने क्रममा दुर्घटना हुँदा उनको ज्यान गएको छ । 

आइतबार दिउँसो स्थानीय साथीभाइसँग गुराँस पार्कमा रहेको प्रतीक्षालयमा खेल्ने क्रममा लडेर गम्भीर घाइते भएका ३९ वर्षीय शेर्पाको उपचारका क्रममा मृत्यु भएको छ  ।

आइतबार दिउँसो जङ्गली जडीबुटी खोज्न र पार्क घुम्न जिरीको ठूलो नागी क्षेत्र गएका शेर्पा जिरी नगरपालिका–६ स्थित गुराँस पार्कको प्रतीक्षालयमा झुन्डिएर खेल्ने क्रममा एक्कासि लडेर गम्भीर घाइते भएका थिए । 

प्रतीक्षालयको ट्रस्टमा झुन्डिएर रमाइलो गर्ने क्रममा सिमेन्टको कंक्रिटमा बजारिँदा उनको टाउकोमा गहिरो चोट लागेको थियो ।

वैतेश्वर र जिरीमा काठ तथा मुडा बोकेर गुजारा चलाउँदै आएका शेर्पालाई स्थानीयले चन्दा संकलन गरेर तत्काल काठमाडौं हेलिकप्टरमार्फत उदार गरे पनि अस्पतालले सोमबार ११ बजे शेर्पालाई मृत घोषणा गरेको स्थानीय तेन्जिङ शेर्पाले बताए ।

स्थानीय शेर्पाका अनुसार गाउँ घरमा मुडा र काठ बोकेर गुजारा चलाउँदै आएका सामान्य परिवारको मान्छे भएको र पारिवारिक अवस्था अत्यन्तै कमजोर रहेकोले उपचारको लागि चन्दा संकलन गरेर पठाएको र हेलिकप्टर चार्ज र अस्पताल खर्च ठुलो लागेकोले सबैलाई सहयोग गर्न अनुरोध गरिएको छ । –सुवाश बस्नेत/ दोलखा