काठमाडौ– ताइवानले इतिहासकै लामो ‘लाइभ फायर’ सैन्य अभ्यास सञ्चालन गरेको छ । ताइवानले इतिहासकै सबैभन्दा लामो हान कुआङ सैन्य अभ्यास सञ्चालन गरेको ताइपेई टाइम्सले जनाएको छ ।

यो अभ्यास १० दिनसम्म सञ्चालन भएको थियो । ताइवानका राष्ट्रिय प्रतिरक्षामन्त्री वेलिङ्टन कुले अभ्यास क्रममा देखाएको युद्ध तत्परताका लागि सेनाको प्रसंशा गरेका छन् ।

यसअघि पनि ताइवानी फौजले हान कुआङ सैन्य अभ्यास गर्दै आएको थियो । तर, यसअघिका सैन्य अभ्यास केबल ५ दिनसम्म सञ्चालन हुने गरेको थियो ।

यसपाली भने ताइवानी सेनाले १० दिनसम्म अभ्यास गरेको हो । यस अभ्यासका क्रममा अमेरिकामा निर्मित हाइमार्स तोपखाना प्रणाली, टो २ बी ट्याङ्क प्रतिरोधी क्षेप्यास्त्र र नयाँ हवाई उपकरण परिचालन गरिएको छ ।