काठमाडौं– भारत र फिजीका अधिकारीबीच रक्षा सहकार्यबारे संयुक्त कार्यसमूहको बैठक सम्पन्न भएको छ । फिजीको राजधानी सुभामा दुई मुलुकको संयुक्त कार्यसमूहको पहिलो बैठक सम्पन्न भएको हो ।

बैठकमा भारतका तर्फबाट रक्षा मन्त्रालयका सहसचिव विश्वेश नेगी र फिजीका तर्फबाट कार्यवाहक स्थायी रक्षासचिव सैनितिकी राभुसो सहभागी थिए । बैठकमा सैन्य प्रशिक्षण, क्षमता अभिवृद्धि र द्विपक्षीय सम्बन्ध मजबुत बनाउने विषयमा छलफल भएको भारतीय समाचार संस्था एएनआईले जनाएको छ ।

पछिल्लो समय फिजी र भारतबीचको सम्बन्ध थप गहिरो बन्दै गएको एएनआईले उल्लेख गरेको छ । भारत फिजीको महत्वपूर्ण विकास साझेदारका रुपमा रहेको छ ।

त्यसबाहेक दुई मुलुकबीच जनस्तरको सम्बन्ध पनि प्रगाढ रहेको बताइएको छ । फिजीबाट हरेक वर्ष सयौँ विद्यार्थीहरु उच्च शिक्षाका लागि भारत आउने गरेका छन् । भारतबाट पनि फिजीमा ठूलो सङ्ख्यामा पर्यटकहरु जाने गरेका छन् ।