काठमाडौं – वैदेशिक रोजगारीमा आकर्षक तलबको प्रलोभनमा पारी विभिन्न देश पठाइदिन्छु भन्दै रकम ठगी गरेको अभियोगमा पाँच जनालाई प्रहरीले पक्राउ गरेको छ ।

पक्राउ पर्नेहरूमा टोखा नगरपालिका-९ बस्ने लमजुङ दुधपोखरी-४ का साजन गुरूङ, ललितपुर महालक्ष्मी-८ बस्ने रूपन्देही तिलोत्तमा -१ का दिपक थापा, काठमाडौं कागेश्वरी मनोहरा-५ बस्ने दाङ घोराही-१५ का टेकबहादुर केसी, ललितपुर-२३ बस्ने स्याङ्जा वालिङ-७ का भरतप्रसाद पाण्डे र भक्तपुर मध्यपुर थिमी-३ बस्ने पर्वत विहादी-४ का प्रेमप्रसाद भुषाल छन् ।

पक्राउ परेका मध्ये साजनले जर्मनी पठाइदिन्छु भन्दै एक जनाबाट १२ लाख ८० हजार रूपैयाँ, दिपकले जर्जिया पठाइदिन्छु भन्दै तीन जना बाट ६ लाख रूपैयाँ, टेकबहादुरले ग्रीस पठाइदिन्छु भन्दै ६ जनाबाट २१ लाख रूपैयाँ, भरतले कोरिया पठाइदिन्छु भन्दै तीन जनाबाट २० लाख रूपैयाँ र प्रेमले कोरिया पठाइदिन्छु भन्दै ३ जनाबाट ३३ लाख ५० हजार रूपैयाँ लिई सम्पर्कविहीन भएको पीडितहरूको उजुरीको आधारमा पक्राउन गरिएको काठमाडौं उपत्यका अपराध अनुसन्धान कार्यालय टेकुले जनाएको छ ।

प्रहरीले साजन र टेक बहादुरलाई काठमाडौं-२६ बाट तथा दिपकलाई काठमाडौं-३० बाट बुधबार, भरत र प्रेमलाई ललितपुर-१५ बाट बिहीबार पक्राउ गरेको हो । उनीहरूलाई आवश्यक अनुसन्धान तथा कारबाहीका लागि वैदेशिक रोजगार विभाग ताहाचल काठमाडौं पठाइएको छ ।