काठमाडौं- कम्बोडिया र थाइल्याण्डबीचको झडप शुक्रबार दोस्रो दिन पनि जारी छ । शुक्रबार दुबै मुलुकले एक अर्काविरुद्ध भारी तोपले आक्रमण गरेको समाचार संसथा रोयटर्सले जनाएको छ ।

पछिल्लो तनावका क्रममा हालसम्म १६ जनाको ज्यान गइसकेको छ । मारिनेमा १५ जना थाइल्याण्डका छन् भने एक जना कम्बोडियाका छन् ।

शुक्रबार सबेरै कम्बोडियाले रुसमा निर्मित बीएम–२१ रकेट प्रणालीले थाइल्याण्डको उबोन राट्चाठानी र सुरिन प्रान्तमा हमला गरेको थाई सेनाले जनाएको छ । अधिकारीका अनुसार तनाव बढ्दै जाँदा थाइल्याण्डको भूमिबाट १ लाख जनालाई सुरक्षित स्थानतर्फ सारिएको छ ।

कम्बोडियाली आक्रमणको जवाफमा आफ्नो सेनाले पनि आवश्यक जवाफी कारवाही सञ्चालन गरेको थाई सेनाले उल्लेख गरेको छ । हाल थाइल्याण्डले कम्बोडियासँगको सीमा क्षेत्रमा दर्जनौँ ट्रक, बख्तरबन्द गाडी र ट्याङ्क परिचालन गरेको जनाइएको छ ।

कम्बोडियाले भने थाई फौजले क्लस्टर म्युनिसनले आक्रमण गरेको जनाएको छ । थाई लडाकु विमानले कम्बोडियामा क्लस्टर म्युनिसनबाट आक्रमण गरेको कम्बोडियाले जनाएको हो ।

अन्तर्राष्ट्रिय कानुनअनुसार यस्तो हतियारको प्रयोग अवैध मानिन्छ ।