म्यानचेस्टर – इंग्ल्यान्डसँगको चौथो टेस्टमा भारतले ऋषभ पन्तलाई चोटका कारण गुमाएको छ। साइ सुदर्शनले पहिलो टेस्ट अर्धशतक प्रहार गरेपछि म्यानचेस्टरमा जारी टेस्टको पहिलो दिनको खेल सकिँदा भारतले ४ विकेटको क्षतिमा २६४ रन जोडेको छ। पन्त भने ३७ रन बनाएपछि रिटायर्ड हर्ट भए।

सुदर्शन ६१ रनमा आउट भए। यस भन्दा अघि पारीको सुरुवात गरेका यशस्वी जयसवालले ५८ रन जोडेका थिए। रवीन्द्र जडेजा र शार्दूल ठाकुर समान १९ रनमा अविजित छन्।

इंग्ल्यान्डका बेन स्टोकले दुई विकेट लिएका छन्। गत वर्ष न्युजिल्यान्डसँग हारे यता तेस्रो क्रममा ब्याटिङ गर्न आएका सुदर्शन पहिलो पटक भारतीय टोलीका लागि अर्धशतक प्रहार गर्न सफल भए।

टस जितेर फिल्डिङ रोजेको इंग्ल्यान्डले यो टेस्ट जिते कप्तान बेन स्टोक्सको निर्णय ऐतिहासिक ठहर हुने छ। यसअघि म्यानचेस्टरमा पहिला फिल्डिङ गरेका कुनै टोलीले खेल जितेका छैनन्।