काठमाडौं– ताइवानमा चिनियाँ सैनिक अतिक्रमण बढ्दै गएको पाइएको छ । पछिल्लो समय ताइवानले आफ्नो क्षेत्रमा १७ वटा लडाकु विमान, ८ नौसैनिक युद्धपोत र एउटा पानीजहाज पहिचान गरेको छ ।

ताइवानको राष्ट्रिय रक्षा मन्त्रालयका अनुसार १७ मध्ये ७ लडाकु विमानले चीन र ताइवानलाई छुट्याउने मध्यरेखा पार गरी हवाई प्रतिरक्षा पहिचान क्षेत्र प्रवेश गरेको जनाएको छ । ती लडाकु विमान ताइवानको उत्तरी, दक्षिणपश्चिमी र पूर्वी हवाई प्रतिरक्षा पहिचान क्षेत्रमा प्रवेश गरेका थिए ।

चिनियाँ कदमको प्रतिक्रियामा ताइवानको रक्षा बलले पनि लडाकु विमान र युद्धपोत तैनाथ गरेको मन्त्रालयले जनाएको छ । ताइवानलाई चीनले आफ्नै मुलुकको एक हिस्सा मान्दै आएको छ ।

स्वतन्त्र रुपमा लोकतान्त्रिक शासन सञ्चालन गर्दै आएको ताइवानलाई साम्यवादी शासन व्यवस्था रहेको चीनले आफ्नै मातहत ल्याउने चेतावनी दिँदै आएको छ । यसका लागि आवश्यक परे बल प्रयोग गर्ने चिनियाँ नीति रहीआएको छ ।