काठमाडौं – प्रदर्शनका हिसाबले असार महिना नेपाली फिल्मका लागि खासै उत्साहजनक देखिएन । असारमा एक मात्रै नेपाली फिल्म प्रदर्शनमा आयाे ।

अहिले देशभरका हलमा १४ वटा फिल्म प्रदर्शनरत छन् । त्यसमध्ये १२ वटा विदेशी फिल्म हुन् ।

यति धेरै नेपाली फिल्मका बीचमा दुई नेपाली फिल्म ‘ऊनको स्वीरट’ र ‘यो मन त मेरो नेपाली हो’ छन् ।

वैशाख २६ गते प्रदर्शनमा आएको हिट फिल्म ‘ऊनको स्वीटर’ साउन ५ गते सोमबारलाई तीन शो पाएको छ । प्रदर्शनको ७४ दिन अझै यो फिल्म हलमा टिकिरहेको छ ।

‘यो मन त मेरो नेपाली हो’ असार २७ बाट प्रदर्शनमा आएको हो । बक्स अफिसमा फ्लप बन्दा प्रदर्शनको ११ औं दिनमा यो फिल्म तीन शोमा खुम्चिएको छ ।

अर्थात, साउन ५ गते यी दुवै फिल्मले बराबर तीन–तीन शो पाएका छन् ।

यी दुईले पाएको शो संख्याभन्दा नेपाली हलमा प्रदर्शनरत विदेशी फिल्मको संख्या ठीक दोब्बर छ ।

किन भयो यस्तो ?

साउनको २ गते परेको यस महिनाको पहिलो शुक्रबार पार गर्दासम्म यो वर्ष प्रदर्शनमा आएको एक फिल्म ‘ऊनको स्वीटर’ हिट बन्यो ।

वैशाखमा हरेका साता जसो नयाँ फिल्म प्रदर्शनमा आए । तर, ‘ऊनको स्वीटर’ मात्रै व्यापारिक रुपमा सफल भयो ।

जेठमा पनि हरेक साता जस्तो नयाँ फिल्म प्रदर्शनमा आए । जेठमा प्रदर्शनमा आएका पाँच वटा फिल्म नै फ्लप भए ।

असारमा एक मात्रै फिल्म ‘यो मन त मेरो नेपाली हो’ प्रदर्शनमा आयो । यो पनि फ्लप भयो ।

अर्थात्, जेठमा प्रदर्शनमा आएका सबै फिल्म फ्लप बन्दा र असारमा प्रदर्शनमा आएको एक फिल्म पनि बक्स अफिसमा कमजोर बन्दा हलमा विदेशी फिल्म हाबी भएका हुन् ।

साउन १६ गते यस महिनाको तेस्रो शुक्रबार मात्रै फ्रेस नेपाली फिल्म ‘रियाल रिङ्गेट’ प्रदर्शनमा आउँछ । हलमा फ्रेस नेपाली फिल्म लाग्न अझैँ १२ दिन बाँकी छ ।

शो संख्या कम भएकाले अहिले प्रदर्शनरत दुई फिल्म साउन १६ सम्म टिक्न मुस्किल देखिन्छ । यदि यस्तो भएको अवस्थामा हलमा विदेशी फिल्म एकछत्र प्रदर्शनमा आउने देखिन्छ ।