काठमाडौं – भनिन्छ, कुनै पनि चलचित्र राम्रो बन्नका लागि राम्रो स्किृप्ट चाहिन्छ । यो अर्थले हेर्ने हो भने ‘रातो टीका निधारमा’ कमजोर चलचित्र हो भनेर भनिरहनु पर्दैन । चलचित्रले दर्शक तथा समीक्षकबाट खासै राम्रो समीक्षा नपाए पनि दशैँको मुखमा रिलिज भएको फिल्मले शायद घाटा भने बेहोर्नुपर्ने छैन ।

धेरैलाई चासो छ, चलचित्र ‘रातो टीका निधारमा’ मा अशोक शर्माले आफ्ना छोरा अंकित शर्मालाई डेब्यु गराएका छन् । त्यसकारण चलचित्रमा उनको अभिनय कस्तो छ होला?

प्रचारका क्रममा अकिंत शर्माले भनेका थिए – यो मेरो पहिलो चलचित्र हो, सिक्दैछु ।

उनले भनेजस्तै यो चलचित्रमा अंकितले शिकारु कलाकारले गर्नेजस्तो अभिनय गरेका छन् । उनको अभिनयमा खासै दम छैन । त्यसो त कलाकारलाई कसरी अभिनय गराउने भन्नेमा निर्देशकको पनि उत्तिकै जिम्मा हुन्छ । यस अर्थमा चलचित्रमा निर्देशक शर्माको काम देखिँदैन । चलचित्रमा अंकितले गरेको अभिनयले दर्शकको मन जित्दैन ।

त्यसो त नेपाली चलचित्रमा सिक्दै चलचित्रलाई ‘प्रयोग’ का रुपमा लिने कलाकारको कमी छैन । अंकित पनि त्यही समूहमा परेका छन् ।

चलचित्रमा साम्राज्ञीको अभिनयले पनि मन जित्न नसकेको दर्शकले गुनासो गरेका छन् । शीर्ष भूमिकामा देखिएकी साम्राज्ञीको अभिनय उनका अन्य फिल्ममा जस्तै फितलो छ । उनले गाउँले युवतीको भूमिका निभाएकी छिन् तर उक्त भूमिका त्यति स्वभाविक लाग्दैन । कतिपय दर्शकले उनले गाउँले भूमिका निभाउन खोजे पनि त्यो अस्वभाविक देखिएको प्रतिक्रिया दिएका छन् ।

त्यसो त चलचित्रमा साम्राज्ञीलाई शहरीया युवतीको भूमिकामा पनि देखाइएको छ, तर उक्त भूमिका पनि राम्रोसँग पर्दामा उतारिएको छैन ।