काठमाडौं– पछिल्ला दिनहरूमा भारतीय फिल्म तथा टेलिभिजन उद्योगले एकपछि अर्को गर्दै विशिष्ट कलाकारहरू गुमाउनु परेका छन् । 

शेफाली जरिवाला, कोटा श्रीनिवास राव र बी. सरोजा देवीको निधनपश्चात् अब उद्योगले अर्का एक वरिष्ठ अभिनेता तथा निर्माता धीरज कुमारको निधनसँगै गहिरो शोक व्यक्त गरिरहेको छ । 

भारतीय मिडिया पिङ्कभिल्ला अनुसार ७९ वर्षका कुमार केही समयदेखि निमोनियाबाट पीडित थिए र मुम्बईको कोकिलाबेन धीरुभाई अम्बानी अस्पतालमा उपचाररत थिए । अस्पतालमा गहन उपचारका बाबजुद उनी आज मंगलबार बिहान निधन भएको अस्पताल स्रोतहरूले पुष्टि गरेका छन्।  

धीरज कुमारको करियरको सुरुआत सन् १९६५ मा भएको थियो, जब उनले राजेश खन्ना र सुभाष घाइसँगै एउटा प्रतिष्ठित प्रतिभा खोज प्रतियोगितामा भाग लिएका थिए  । 

यद्यपि राजेश खन्ना विजेता बने, कुमार उत्कृष्ट प्रतिस्पर्धीहरूमध्ये एक रहँदै अभिनय यात्रा थाले। उनले १९७० र ८० को दशकमा रोटी कपडा और मकान, स्वामी, बेजुबान जस्ता चर्चित हिन्दी चलचित्रहरूमा अभिनय गरे ।

त्यस्तै, १९७० देखि १९८४ सम्म उनले २० भन्दा बढी पञ्जाबी चलचित्रहरूमा समेत अभिनय गरे ।

अभिनयको सफल यात्रा पछाडि कुमारले टेलिभिजन उद्योगतर्फ पाइला टेके र निर्माता रूपमा नयाँ अध्याय सुरु गरे। उनले ‘क्रिएटिभ आइ’ नामक प्रोडक्सन हाउस स्थापना गरे र मिली, कहाँ गए वो लोग, मायका, तथा लोकप्रिय कोर्टरुम ड्रामा अदालत  जस्ता कार्यक्रमहरू निर्माण गरे । 

सन् २००० को दशकको सुरुवाततिर उनले उत्पादन गरेका शोहरूले भारतीय टेलिभिजन सामग्रीमा नयाँ उचाइ थपे।

धीरज कुमारको निधनले भारतीय मनोरञ्जन उद्योगले एक बहुआयामिक प्रतिभा गुमाएको महसुस गरिरहेको छ।