काठमाडौं– च्याटजीपीटी निर्माता कम्पनी ओपनएआईले एआईबाट सञ्चालन हुने वेब ब्राउजर ल्याउने तयारी गरेकाे छ । केही सातामै ओपनएआईले एआईमा आधारित वेब ब्राउजर लन्च गर्ने अपेक्षा गरिएको छ ।

यसले प्रयोगकर्ताहरूलाई ब्राउजरभित्रै सबै जानकारी प्रदान गर्ने दाबी गरिएको छ । ओपनएआईले एआईमा आधारित ब्राउजर ल्याएको खण्डमा त्यसले गुगललाई ठूलो घाटा हुने विश्लेषण गरिएको छ । अहिले सबैभन्दा धेरै प्रयोग हुने ब्राउजरमा क्रोमको नाम शीर्ष स्थानमा आउँछ । क्रोमले ब्राउजर बजारको ६० देखि ७० प्रतिशत हिस्सा ओगट्दै आएको अनुमान गरिएको छ ।

नयाँ एआई ब्राउजरले प्रयोगकर्ताहरूलाई उत्कृष्ट अनुभव प्रदान गर्ने दाबी गरिएको छ । यसबाट प्रयोगकर्ताहरूले कुनै वेबसाइटमा प्रवेश नगरीकनै सबै जानकारी प्राप्त गर्न सक्नेछन् ।

समाचारमा दाबी गरिएअनुसार ओपनएआईले तयार गरिरहेको ब्राउजर क्रोमियममा आधारित छ । यो एक प्रकारको ओपन–सोर्स कोड हो । क्रोमियममै आधारित रहेर गुगलको क्रोम, माइक्रोसफ्ट एज र ओपेरा ब्राउजरको पनि विकास गरिएको हो ।