काठमाडौं- भारतका जल परिवहनमन्त्री सर्वानन्द सोनोवालले कालादान परियोजना सन् २०२७ देखि सञ्चालनमा आउने बताएका छन् । पूर्वोत्तर क्षेत्रमा सहज पहुँच विस्तार गर्नका लागि भारतले म्यान्मारसँग मिलेर यस परियोजना निर्माण गरिरहेको छ ।

यस परियोजना सम्पन्न भएको खण्डमा पश्चिम बङ्गालको राजधानी कोल्काता र मिजोरम राज्यको राजधानी ऐजवालबीचको दूरी ७ सय किलोमिटरले छोटिने अपेक्षा गरिएको उनले बताए । हाल सित्वे बन्दरगाह तयार रहेको बताउँदै उनले म्यान्मारको बाटो हुँदै ऐजवाललाई उक्त बन्दरगाहसँग जोड्ने कार्य जारी रहेको जानकारी दिए ।

सित्वे बन्दरगाह म्यान्मारको रखाइन राज्यमा अवस्थित रहेको छ । सन् २०२३ मा सञ्चालनमा आएयता उक्त बन्दरगाहमा कोल्कातादेखि गएका जहाजबाट २ हजार मेट्रिक टन कार्गो अनलोड गरिएको छ ।

मन्त्री सोनोवालले पूर्वोत्तर क्षेत्रले भारतको आर्थिक समृद्धिका लागि महत्वपूर्ण भूमिका निर्वाह गर्ने विश्वास व्यक्त गरे । इण्डियन डिफेन्स रिसर्च विङका अनुसार भारतको जलपरिवहन मन्त्रालयले जलमार्गको विकासका लागि १ हजार करोड भारतीय रुपैयाँ लगानी गरेको छ ।