काठमाडौं – भदौ ६ गते बाट प्रदर्शनमा आउन लागेको फिल्म ‘अभिमन्यु’को नयाँ पोस्टर सार्वजनिक भएको छ ।

निर्माण पक्षले सोमबार फिल्मका नायक कामेश्वर चौरासियालाई एकल प्रस्तुत गरी पोस्टर सार्वजनिक गरेको हो ।

पोस्टरको दाहिनेतिर कामेश्वर चिच्चाइरहेको देख्न सकिन्छ । उनको पृष्ठभूमिमा विराटनगर कारागार छ । पोस्टरको देब्रेतिरको तल्लो भागमा एउटा रातो झोला देख्न सकिन्छ ।

रातो झोला, कारागार र कामेश्वरको अनुहारको हाउभाउले फिल्मले क्राइमको कथा उठान गरेरे संकेत गर्छ ।

यो फिल्ममा कामेश्वरसहित नायिकाहरु सरिता गिरी, गौमाया गुरुङ र लक्ष्मी बर्देवा शीर्ष भूमिकामा छन् ।

फिल्मको निर्देशक सुशान्त गौतम हुन् । उनको यो डेब्यू फिल्म हो । सेभेज सिज सिनेमाको प्रस्तुतीमा बनेको यस फिल्मका निर्माताहरु विनोद पौडेल र गुञ्जन गिरी हुन् ।