काठमाडौं– प्रमुख प्रतिपक्षी दल नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले ‘भ्रष्टाचार गर्दिनँ र गर्न पनि दिँदिन्ँ’ भन्ने प्रधानमन्त्री केपी शर्मा ओलीको अभिव्यक्तिलाई आमनागरिकले जाली ठानिसकेको बताएका छन् । 

प्रतिनिधिसभाको सोमबारको बैठकमा उनले सरकारका मन्त्रीहरू कर्मचारीको सरुवा र आयोगका पदाधिकारी नियुक्तिमा खुलेआम लाखौंको डील गरिरहेको प्रति लषित गर्दै यस्तो टिप्पणी गरेका हुन् । 

प्रधानमन्त्रीप्रति व्यंग्य गर्दै अध्यक्ष प्रचण्डले प्रश्न गरे, ‘तपाईंका मन्त्रीहरू खुल्लमखुल्ला लाखौंको डील गरिरहेका छन् । प्रधानमन्त्रीज्यू, चित्रगुप्तलाई बयान कहाँ गएर दिने हो ?’ 

उनले सरकार जहाँ–जहाँ छ, त्यहाँ–त्यहाँ भ्रष्टाचार भएको आरोप पनि लगाए । ओली नेतृत्वको सरकारले सत्तालाई बिचौलियाको स्वार्थ र भ्रष्टाचारीको संरक्षणमा चलाएको पनि बताए ।