काठमाडौं– आगामी आर्थिक वर्षको मौद्रिक नीतिमार्फत राष्ट्र बैंकले ब्याजदरका दुवै करिडोरलाई घटाएको छ । शुक्रबार आगामी आर्थिक वर्षको मौद्रिक नीति घोषणा गर्दै गभर्नर डा. विश्वनाथ पौडेलले ब्याजदर करिडोरको माथिल्लो सीमाको रूपमा रहेको बैंकदरलाई ६.५ प्रतिशतबाट घटाई ६.० प्रतिशत कायम राखिएको बताएका हुन् । 

त्यस्तै, ब्याजदर करिडरको तल्लो सीमाको रूपमा रहेको निक्षेप संकलन दरलाई ३.० प्रतिशतबाट घटाई २.७५ प्रतिशत निर्धारण गरिएको छ । नीतिगत दरलाई ५.० प्रतिशतबाट घटाई ४.५ प्रतिशत कायम गरिएको उनले बताए ।

आगामी आर्थिक वर्षको मौद्रिक नीतिबाट बैंकदर, नीतिगत दर र ब्याजदर करिडोर घटाइएकोले अब ब्याजदर घट्ने बैंकिङ क्षेत्रका विज्ञ अनलराज भट्टराईले खबरहबलाई बताए । उनले मौद्रिक नीतिको समग्र प्रभावलाई आंकलन गर्नको लागि नीतिगत व्यवस्थालाई हेर्नुपर्ने बताएका छन् ।