काठमाडौं – गायक तथा मोडल दुर्गेश थापाले ‘दुस्मन हेरेको हर्‍यै’ हिटको रापतापमै रहेका बेला अर्को गीत ‘जाने भए जाम माया’ लिएर दर्शकमाझ आएका छन् ।

यो गीतको भिडियो छायाङ्कनकै क्रममा चर्चामा थियो । कारण- दुर्गेशले भ्लगर सिसन बानियाँ र सामाजिक सञ्जालकी भाइरल पात्र ‘गुराँस नानी’सँग सहकार्य गर्दै थिए ।

उनीहरूको सहकार्य दर्शकले बुधबारबाट हेर्न पाए । दुर्गेशले आफ्नै युट्युब च्यानलबाट उक्त गीत सार्वजनिक गरेका छन् ।

सार्वजनिक भएको केही २० घण्टा नबित्दै गीत युट्युबको संगीततर्फ ट्रेन्डिङ नम्बर १ मा पर्न सफल भएको छ ।

उक्त अवधिमा यो गीतले १७ लाखभन्दा बढी भ्युज पाइसकेको छ । एक लाख ९० हजारभन्दा बढीले लाइक गरेका छन् । १६ हजारभन्दा बढी कमेन्ट गरेका छन् ।

नेपालको सन्दर्भमा दुर्गेशको गीत ‘जाने भए जाम माया’ पाएको भ्युज सामान्य होइन । यसअघि २४ घण्टामा सबैभन्दा बढी हेरिएको गीत विष्णु माझीको स्वरमा रहेको ‘आइनँ आमा यो तीजमा’ थियो । जसले उक्त अवधिमा १५ लाखभन्दा केही बढी भ्युज पाएको थियो ।

अर्थात्, दुर्गेश ‘जाने भए जाम माया’ छोटो अवधिमा सबैभन्दा बढी भ्युज पाउने गीत बनेको छ । यस गीतको शब्द र संगीत दुर्गेशकै हो । यसमा दुर्गेश, सिसन र अल्हाजी गेरोले स्वर दिएका छन् ।