काठमाडौं- अवैध हुण्डी कारोबार र क्रिप्टोकरेन्सी (अभौतिक मुद्रा) को कारोबार गर्ने दुई भारतीय नागरिकलाई प्रहरीले नियन्त्रणमा लिएको छ ।

एक अर्ब ५० करोड बढीको क्रिप्टोकरेन्सी कारोबार गर्ने दुई भारतीय नागरिकहरु रमेशकुमार गुप्ता र विपिन कुमारलाई पक्राउ गरिएको प्रहरी प्रधान कार्यालय अनुसन्धान ब्युरोले जनाएको छ ।

गुप्ताले संचालन गरेको राजतीर्थ ट्रेडर्स नाम गरेको किराना पसलको आवरणमा गैरकानुनी हुण्डी तथा अभौतिक मुद्राको कारोबार भइरहेको प्रहरीको भनाइ छ ।

सोमबार ललितपुरको सानेपास्थित कालोपुलबाट उनीहरुलाई नियन्त्रणमा लिइएको प्रहरीले जनाएको छ । प्रहरीका अनुसार उनीहरुलाई मुलुकी अपराध संहिता, २०७४ को अभौतिक मुद्राको प्रयोग गर्न नहुने, हुण्डीसम्बन्धि कारोबार गर्न नहुने कसूर र वन्यजन्तु सम्बन्धी कसूरमा मुद्दा चलाइने छ ।