काठमाडौं – एएफसी महिला एसियन कप २०२६ छनोटअन्तर्गत समूह ‘एफ’को निर्णायक खेलमा नेपाल पहिलो हाफमा उज्बेकिस्तानसँग ३–१ ले पछि परेको छ।

खेलको सुरुवातमै उज्बेकिस्तानले दबाब बनाएको थियो। दोस्रो मिनेटमै उज्बेकिस्तानले पहिलो गोल गर्दै अग्रता लियो। त्यसपछि ११औं मिनेटमा पुनः एक गोल थप्दै उनीहरूले अग्रता दोब्बर पारे।

दोस्रो गोल टोली कप्तानको प्रयासबाट भएको थियो। उनले बाँया विंगबाट प्रहार गर्दा नेपाली डिफेन्डर समीक्षा घिमिरेलाई लागेर बल पोष्टमा गएको थियो ।

२४औं मिनेटमा नेपालकी कप्तान साबित्रा भण्डारीले एक उत्कृष्ट गोल गर्दै नेपाललाई खेलमा फर्काउने आशा जगाइन्। तर त्यो आशा धेरै समय टिक्न सकेन। ३९औं मिनेटमा उज्बेकिस्तानकी शोएमोभले पेनाल्टीमार्फत गोल गर्दै टिमको अग्रता फेरि दुई गोलले बढाइन्।

यद्यपि पहिलो हाफको अन्त्यमा नेपालका लागि राहतदायक बन्यो । उज्बेकिस्तानकी खेलाडी एन. एर्गासेभाले दोहोरो पहेँलो कार्ड पाउँदै मैदानबाट बाहिरिइन्। यससँगै उज्बेकिस्तान अब दोस्रो हाफ १० खेलाडीमा सिमित हुनेछ।

पहिलो हाफमै नेपालले एक खेलाडी परिवर्तन गरेको छ। डिफेन्डर निशा थोकरको स्थानमा प्रीति राई ३०औं मिनेटमा मैदान प्रवेश गरेकी थिइन्।

यो खेलको विजेता टोलीले एएफसी महिला एसियन कप २०२६ मा स्थान बनाउनेछ ।