काठमाडौं– नेपाली कांग्रेसका नेता ज्ञानेन्द्रबहादुर कार्कीले १५ औँ महाधिवेशन समयमा हुन्छ कि हुँदैन भनेर बहस गर्नुको कुनै अर्थ नभएको बताएका छन् ।

कांग्रेस केन्द्रीय कार्यसमितिको शुक्रबारको बैठकमा उनले महाधिवेशनको मिति तोकिनुपर्ने माग गर्दै आएका नेताप्रति लक्षित गर्दै यस्तो अभिव्यक्ति दिएका हुन् । 

‘महाधिवेशन समयमा हुन्छ कि हुँदैन भनेर बहस गर्नुको अर्थ छैन । महाधिवेशन हामीले नै गर्ने हो,’ सभापति शेरबहादुर देउवाका विश्वासवपात्रमा पर्ने नेता कार्कीले भने, ‘बाहिर मिडियामा महाधिवेशन कहिले हुन्छ भनेर प्रश्न गर्नुको साँटो हामी सबैले महाधिवेशन गर्नेतर्फ लाग्नु पर्दछ ।’ 

उनले पार्टीको महाधिवेशन केवल सभापति देउवाको मात्रै जिम्मेवारी नभएको पनि जवाफ दिए । ‘महाधिवेशन गर्ने जिम्मेवारी एक जना सभापतिको मात्रै होइन, यो सिंगो कार्यसमितिकै हो,’ कार्कीले भने, ‘१४ औँ महाधिवेशनका बेला पनि सभापतिज्यूमाथि महाधिवेशन कहिले हुन्छ भनेर प्रश्न उठाइने गरिन्थ्यो । तर वैधानिक समयमै महाधिवेशन गराउनुभयो ।’ 

पार्टीका १५ औँ महाधिवेशन मात्र औपचारिकताका लागि नभएर देशको भविष्यका लागि कांग्रेसको नेतृत्वमा मात्रै सम्भव छ भन्ने सन्देश दिने गरी सम्पन्न गर्नुपर्ने उनको भनाइ थियो । 

‘१५ औँ महाधिवेशन केवल औपचारिकताका लागि मात्रै होइन, यो देशको भविष्य कांग्रेसकै नेतृत्वमा मात्रै सम्भव छ भन्ने सन्देश दिने गरी हामीले वडा तहदेखि अधिवेशन गर्नुपर्दछ,’ कार्कीले भने, ‘सबै जातजाति भाषाभाषी र समुदायको साझा प्रतिनिधित्व हुने गरी अधिवेशनमा लाग्नुपर्दछ ।’

नेता कार्कीले अन्तर्राष्ट्रिय जगतले विश्वास गरेका देउवाबाट देशले धेरै अपेक्षा गरेको पनि जिकिर गरे । ‘देशमा मात्रै होइन, अन्तर्राष्ट्रिय जगतले विश्वास गरेको सभापति हुनुहुन्छ,’ उनले भने, ‘उहाँको नेतृत्वमा कांग्रेस मात्रै होइन, देशले धेरै अपेक्षा गरेको छ ।’