काठमाडौं- नेकपा एमालेका सचिव योगेश भट्टराईले निजमाती सेवा विधेयकमा भएको चलखेललाई गम्भीर अपराध भन्दै यसमा संलग्नलाई तत्कालै कारबाहीको दायरामा ल्याउन माग गरेका छन् ।

सामाजिक सञ्जालमार्फत् आफ्नो धारणा सार्वजनिक गर्दै भट्टराईले यस्तो माग गरेका हुन् ।

उनले संसदीय समितिले सर्वसम्मत पारित गरेको प्रतिवेदनको मूल मर्मविपरीतको दफा कसरी समावेश भयो भनेर प्रश्न पनि गरेका छन् ।

भट्टराईले यस प्रकरणमा अविलम्ब संसदीय छानबिनको माग पनि गरेका छन् । ‘दोषीउपर कडा कारबाही गरिनु पर्दछ । लोकतान्त्रिक प्रणालीमा संसद्को नीतिगत मात्रै होइन, प्रक्रियागत सर्वोच्चता सर्वस्विकार्य मान्यता हो ।’

यस विषयलाई सभामुख देवराज घिमिरेले लिएको चासोलाई उनले स्वागत गरेका छन् ।‘सम्माननीय सभामुखज्यूले लिनुभएको चासो र सक्रियताको स्वागत गर्दछु । तत्काल छानबिन र कारबाहीको प्रक्रियामा उहाँको थप प्रभावकारी पहलको अपेक्षा छ।’