काठमाडौं- प्रहरी अतिरिक्त महानिरीक्षक (एआईजीपी) चन्द्रकुवेर खापुङलाई सम्मान गरिएको छ ।

तेह्रथुमको मेन्छ्यायेम सेवा समाजको आयोजनामा शनिबार काठमाडौँमा आयोजित एक कार्यक्रममा एआईजीपी खापुङलाई सम्मान गरिएको हो ।

उनले मेन्छ्यायेममा जन्मिएर हुर्की त्यहीँ माध्यमिक तहसम्मको अध्ययन पूरा गरेका थिए । त्यसपछि उनी नेपाल प्रहरीकोअरिरिक्त महानिरीक्षक पदमा पुगेर गाउँलाई गौरवान्वित बनाउन सफल भएको भन्दै सम्मान गरिएको समाजका महासचिव केशव भट्टराईले बताए ।

सम्मान कार्यक्रममा तेह्रथुम सरोकार समाजका सल्लाहकार, तथा स्वतन्त्र ऊर्जा उत्पादक संघ इप्पानका वरिष्ठ उपाध्यक्ष मोहनकुमार डाँगीले एक असल र क्षमतावान प्रहरी अधिकृतका रुपमा खापुङले समग्र जिल्लाको शिर उँचो बनाएको बताए ।

उनले खापुङलाई प्रहरी महानिरीक्षक बन्ने शुभकामना पनि दिए । समाजका अध्यक्ष डिल्लीराम ढुङ्गेलले एआईजीपी खापुङ तेह्रथुमको गौरव र प्रेरणाको स्रोत भएको उल्लेख गर्दै थप सफलताको शुभकामना दिए ।

कार्यक्रममा एआईजीपी खापुङले आफ्नो जन्मभूमिका साथीहरूको सम्मान र हौसलाको विशेष अर्थ रहने बताए । यस्तै हौसला, प्रेरणा र स्वस्थ आलोचनाले आफूलाई अघि बढ्न मार्गदर्शन गर्ने उनले बताए ।

यस्तै मेन्छ्यायम गाउँपालिकामै जन्मिएका प्रहरी वरिष्ठ उपरीक्षक अभिनारायण काफ्लेले पनि एआईजीपी खापुङलाई हार्दिक बधाइ दिँदै आफ्ना लागि सधैँ प्रेरणाको पात्र रहेको बताए ।