काठमाडौं– नेपाली कांग्रेसका प्रमुख सचेतक श्यामकुमार घिमिरेले भिजिट भिसा प्रकरण सम्बन्धमा सरकारले गठन गरेको उच्चस्तरीय छानबिन समितिले जिम्मेवारीपूर्वक काम गर्नेमा आफू पूर्ण रूपमा विश्वस्त रहेको बताएका छन् ।

प्रतिनिधिसभाको आजको बैठकमा प्रमुख सचेतक घिमिरेले सदन बहिष्कार गरेका प्रतिपक्षी दलहरूलाई उक्त समितिलाई विश्वास गरेर काम गर्न दिनुपर्नेमा जोड दिए । उनले भने, ‘यसरी सदन बहिष्कार गरेर कति दिन सम्म चल्छ ? संसदीय अभ्यासमा सरकारमाथि विश्वास नगरेर कसरी हुन्छ ?’

प्रमुख सचेतक घिमिरेले समितिलाई साथ दिई सहयोग गर्न आग्रह गरे । साथै उनले त्यसो गरेमा जनताप्रतिको कर्तव्य पनि हुने उल्लेख गरे । भिजिट भिसा प्रकरण सम्बन्धमा अख्तियार दुरुपयोग अनुसन्धान आयोगले समेत छानबिन गरिरहेको उनले बताए ।