काठमाडौँ – नेपालमा सौर्य ऊर्जाका उपकरण बेचबिखन र जडान गर्ने कम्पनी घाम पावरले सन् २०२५ को किलिङ कर्भ प्राइज प्राप्त गरेको छ ।

५० हजार अमेरिकी डलर बराबरको यो पुरस्कार विश्वभरबाट जलवायु परिवर्तनविरुद्ध प्रभावशाली समाधान गरेकालाई प्रदान गर्ने गरिन्छ ।

घाम पावरले ग्रामीण समुदायहरू र उ‌द्योगहरूलाई स्वच्छ तथा वितरण आधारित सौर्य ऊर्जामार्फत सशक्त बनाउँदै नेपालको जलवायु सहनशीलता निर्माणमा पुऱ्याएको योगदानका लागि यो पुरस्कार प्राप्त गरेको कम्पनीले जनाएको छ ।

केन्याको राजधानी नैरोबीमा आयोजना भएको टीईडी काउन्टडाउन समिटमा यो पुरस्कार घोषणा गरिएको हो, जहाँ विश्वभरका नेताहरू र नवप्रवर्तनकर्ताहरूको सहभागितामा जलवायु परिवर्तनविरुद्धका नवीन तथा क्रान्तिकारी विचार आदानप्रदान गरिएको थियो ।

घाम पावरले नेपालमा चार हजारभन्दा बढी सफल परियोजनाहरू पूरा गरिसकेको छ ।