काठमाडौं – निर्देशक अहमद खानलाई फिल्म ‘वेल्कम टू जङ्गल’को छायाङ्कन पूरा गर्न कठिन भएको छ ।

सन् २०२३ मै छायाङ्कनमा सुरु भए पनि अहिलेसम्म यसको खिच्ने काम पूरा भएको छैन । ७० प्रतिशत मात्रै छायाङ्कन भएको बुझिएको छ ।

अहिलेको अवस्थामा यो फिल्मको छायाङ्कन बन्द छ । आर्थिक समस्यामा परेपछि यो फिल्मको छायाङ्कन रोकिएको भारतीय मिडियाहरुले उल्लेख गरेका छन् ।

निर्माण पक्षले दुई वर्षसम्म छायाङ्कन नसकिनुको कारण कलाकारहरुको समय नमिलेको बताएको छ ।

यस फिल्ममा नायक अक्षय कुमार, सञ्जय दत्त, सुनील शेट्टी, अरशद वारसी, परेश रावल शीर्ष भूमिकामा रहेको बताइएको छ ।

नायिकाहरुमा रवीना टन्डन, लारा दत्ता, ज्याकलिन फर्नान्डिज र दिशा पाटानी रहेका छन् ।

उनीहरुसहित जोनि लिवर, राजपाल यादव, तुषार कपूर, श्रेयस तलपडे, कृष्णा अभिषेक र कीकु शारदालगायतका स्टार कलाकारको अभिनय रहेने बताइएको छ ।

यस फिल्ममा १६ जनाभन्दा बढी स्टार कलाकारको अभिनय रहने निर्माण पक्षको दाबी छ ।

यो फिल्मको छायाङ्कन पूरा नहुनुको कारण आर्थिक संकट नै प्रमुख रहेको भारतीय मिडियाहरुको दाबी छ।

तर, निर्माण पक्षले छायाङ्कन रोकिनुको कारण राजनीति विषय रहेको बताएको छ । बाँकी ३० प्रतिशत छायाङ्कन कश्मिरमा गर्ने तालिका रहेको र त्यहाँको अवस्था अहिले सामान्य नरहेकाले काम अगाडि बढ्न नसकेको निर्माण पक्षको दाबी छ ।

अर्थात् निर्माण पक्षले छायाङ्कन प्रभावित हुनुको कारण ‘पहलगाम आतङ्कवादी हमला’ देखाएको छ ।

अब भने निर्माण पक्ष छायाङ्कन निस्कने तयारीमा रहेको खबर भारतीय मिडिया इन्डिया टुडेले लेखेको छ ।

कश्मिरमा हुने भनिएको छायाङ्कनका लागि निर्माण पक्षले वैकल्पिक स्थान हिमाचल फाइनल गरेकाले काम अगाडि बढ्ने खबर बाहिरिएको हो ।

निर्देशक अहमद खानको दाबीले पनि यो फिल्मको छायाङ्कन फेरि सुरु हुने संकेत गर्छ । उनले आर्थिक कारणले फिल्मको छायाङ्कन प्रभावित नभएको दाबी गरे ।

उनले भने, ‘फिल्मको छायाङ्कन रोकिनुको कारण सुरक्षा र मौसम हो । अर्को कारण कलाकारको समय व्यस्थापन हो । आर्थिक कारणले फिल्म रोकिएको होइन ।’

निर्देशकको दाबी यस्तो भए पनि छायाङ्कन फेरि सुरु हुनेबारे उनले कुनै जानकारी दिएका छैनन् ।

’वेल्कम टू जङ्गल’ फिल्म ‘वेल्कम’को सिक्वेल हो ।