काठमाडौं– भारतीय प्रधानमन्त्री नरेन्द्र मोदीले भारत र पाकिस्तानबीचको द्वन्द्व रोक्न अमेरिकाले कुनै भूमिका नखेलेको स्पष्ट पारेका छन् । अमेरिकी राष्ट्रपति डोनाल्ड ट्रम्पसँगको कुराकानीका क्रममा प्रधानमन्त्री मोदीले यसबारे प्रष्टोक्ति दिएका हुन् ।

जी ७ को शिखर सम्मेलनका क्रममा क्यानाडा पुगेका प्रधानमन्त्री मोदीले राष्ट्रपति ट्रम्पसँग टेलिफोनमा ३५ मिनेट कुराकानी गरेका थिए । राष्ट्रपति ट्रम्पले प्रधानमन्त्री मोदीलाई अमेरिका भ्रमणको पनि निम्तो दिएको भारतीय विदेश सचिव विक्रम मिश्रीले जनाएका छन् ।

यद्यपि समय अभावका कारण मोदी अमेरिका जान नपाएको भारतीय समाचार संस्था पीटीआईले जनाएको छ । यसअघि भारत प्रशासित जम्मु कश्मीरको पहलगाम क्षेत्रमा भएको आतंककारी आक्रमणको बदलास्वरुप भारतले पाकिस्तानी भूमिमा रहेका आतंकवादी पूर्वाधारलाई लक्षित गरी सैन्य कारवाही सञ्चालन गरेको थियो ।

अमेरिकी राष्ट्रपति डोनाल्ड ट्रम्पले अपरेशन सिन्दुर नाम दिइएको सो कारवाही आफ्नो मध्यस्थतामा रोकिएको दाबी गर्दै आएका छन् । भारतीय पक्षले भने युद्धविराम गर्ने निर्णयमा अमेरिकाको कुनै भूमिका नरहेको बताउँछ ।