काठमाडौं – बलिउड नायक आमिर खानको फिल्म ‘सितारे जमिन पर’ले अन्तत: प्रदर्शन अनुमति पाएको छ ।

भारतको चलचित्र जाँच बोर्डले (सेन्सर बोर्ड) लामो रस्साकस्सीपछि प्रदर्शनको अनुमति दिएको हो ।

केही दृश्य-संवादलाई लिएर सेन्सर बोर्ड र नायक खानबीच वैचारिक मतभेद भएपछि यो फिल्मले प्रदर्शन अनुमति पाउन ढिला भएको हो ।

फिल्मले राजनीतिक तथा सामाजिक संवेदनामा ध्यान नदिएको, लैङ्गिक संवेदनशीलतामा ख्याल नगरेको भन्दै प्रदर्शन अनुमति दिन बोर्डले ढिलाइ गरेको थियो ।

रोचक कुरा– दुई शब्दलाई लिएर बोर्डले आपत्ति जनाएको थियो । ती शब्दहरु हुन्– कमल र माइकल ज्याक्सन ।

फिल्ममा एक पात्रको नाम माइकल ज्याक्सन राखिएको बुझिएको छ । यो नाम प्रयोग गर्दा कपिराइटको समस्या आउन सक्ने भन्दै बोर्डले निर्माण पक्षको ध्यानकर्षण गराएको थियो ।

त्यस्तै, कमल भारतको सतारुढ दल भारतीय जनता पार्टीको चुनाव चिह्न हो । यस विषयमा बोर्डले आपत्ति जनाएको थियो ।

बोर्डले फिल्मको डिस्क्लेमर पनि संशोधन गर्न समेत सुझाव दिँदै प्रधानमन्त्री नरेन्द्र मोदीको प्रेरणादायी कुरा राख्न निर्माण पक्षलाई दबाब दिएको भारतीय मिडिया आजतकले उल्लेख गरेको छ ।

बोर्डले औल्याएका गल्ती र दिएका सुझावमा नायक खान असन्तुष्ट बनेका थिए । सोहीकारण फिल्मको सेन्सर पासको काम रोकिएको हो ।

तर बोर्डको बैठकले आमिरको अडानको पक्षमा निर्णय गरेपछि फिल्मको सेन्सर पास भएको हो । जुन १६ मा बसेको बोर्डको बैठकले फिल्मलाई केही संशोधन नगरी प्रदर्शनको अनुमति दिएको भारतीय मिडिया आजतकले समाचार लेखेको छ ।