काठमाडौं– नेपाली युवा टोली घरेलु मैदानमा जारी यू-१८ साफ च्याम्पियनसिप फुटबलको समूह चरणबाट बाहिरिएसँगै प्रशिक्षक चेतनारायण श्रेष्ठले राजीनामा दिने घोषणा गरेका छन् ।

समूहको पहिलो खेलमा नै खराब प्रदर्शन गरेको नेपाल प्रतियोगितामा कमजोर प्रतिद्वन्द्वी मानिएको भुटानसँग ३-० को लजास्पद हार ब्यहोर्न पुगेको थियो । माल्दिभ्ससँग १-१ को बराबरी र भुटानसँगको हारसँगै टोलीको यात्रा माल्दिभ्स र भुटानको खेलमा निर्भर थियो ।

आज भएको समूहको अन्तिम खेलमा यी दुबै टोलीले गोलरहित बराबरी खेलेसँगै नेपाल समूह चरणबाट बाहिरिएको हो । लगत्तै श्रेष्ठले हारको सम्पूर्ण जिम्मेवारी लिँदै प्रशिक्षकबाट राजिनामा दिएको घोषणा गरे । उनले भने, “नैतिकताका आधारमा राजीनामा दिन्छु । हारको सम्पूर्ण जिम्मेवारी लिन्छु । मैले तीन प्रतियोगितामा प्रशिक्षण गरे । तर नतिजा निकाल्न नसकेपछि नैतिकताका आधारमा राजीनामा दिनुपर्छ नै । भोलि सचिवालय गएर राजीनामा पत्र दिनेछु ।”

उनले राजीनामाको निर्णय भने भुटानसँगको हारसँगै गरेको पनि बताए । नतिजा निकाल्न नसके पनि आफ्नो प्रशिक्षणमा खेलाडीको प्रदर्शन भने राम्रो भएको प्रशिक्षक श्रेष्ठको दावी छ । यसअघि प्रि-म्याच कन्फेरेन्समा उनले घरेलु मैदानमा उपाधिमा ह्याट्रिक गर्ने बताएका थिए ।