काठमाडौं – भारतले इरानको राजधानी तेहरानमा भएका आफ्नो नागरिकलाई त्यो स्थान छाड्न भनेको छ।

इरानमा १० हजार भारतीय बसोबास गर्ने तथा काम गर्ने अनुमान गरिएको छ। भारतको बाह्य मामला मन्त्रालयले विज्ञप्ति जारी गर्दै इरान पूर्ण रूपमा असुरक्षित भएको जनाएको छ।

मन्त्रालयले अर्मेनियाको सीमा पार हुँदै इरान छाड्न उपयुक्त हुने सुझाव दिएको छ।

संसारको तेस्रो ठूलो तेल आयातकर्ता भारतले सन् २०१९ मा अमेरिकाले प्रतिबन्ध लगाएपछि इरानबाट तेल लिन छाडेको थियो। यसका बाबजुद भारतले इजरायल र इरान दुवै देशसँग मैत्रीपूर्ण सम्बन्ध राखेको थियो।

गत वर्ष भारत र इरानको बीचमा छबाहर बन्दरगाहको विषयमा १० वर्षे सम्झौता भएको थियो। त्यस सम्झौताले भारतीय सामान अफगानिस्तान र केन्द्रीय एसियामा जानका लागि बाटो खुला गरेको थियो।

इजरायल र इरानको यो युद्धले छबाहर बन्दरगाहको भविष्य समेत सङ्कटमा परेको छ।