काठमाडौं- भारतीय प्रधानमन्त्री नरेन्द्र मोदीलाई साइप्रसमा सर्वोच्च नागरिक सम्मान प्रदान गरिएको छ । जी ७ सम्मेलनमा सहभागी हुन क्यानाडा जानुअघि साइप्रस भ्रमणमा रहेका प्रधानमन्त्री मोदीलाई त्यहाँको सर्वोच्च नागरिक सम्मान ग्राण्ड क्रस अफ दर अर्डर अफ माकारियोस तृतीय प्रदान गरिएको हो ।

सम्मान प्राप्त गरेपछि प्रधानमन्त्री मोदीले कृतज्ञता प्रकट गरेका छन् । उनले भनेका छन्, ‘साइप्रसको ग्राण्ड क्रस अफ दर अर्डर अफ माकारियोस तृतीय प्राप्त गरेकोमा कृतज्ञ छु । म यसलाई हाम्रा राष्ट्रबीच कायम मित्रताप्रति समर्पित गर्न चाहन्छु ।’

साइप्रसका राष्ट्रपति निकोस क्रिस्टोडोलिडेसले प्रधानमन्त्री मोदीलाई यस सम्मान प्रदान गरेको भारतीय समाचास संस्था प्रेस ट्रष्ट अफ इण्डियाले उल्लेख गरेको छ । उनले दुई मुलुकबीचको सम्बन्धले थप उचाइ प्राप्त गर्ने विश्वास पनि व्यक्त गरेका छन् ।

साइप्रसका प्रथम राष्ट्रपति आर्चबिशप मकारियोस तृतीयका नाममा यस सम्मान प्रदान गरिन्छ । प्रधानमन्त्री मोदी साइप्रसको भ्रमण सकेर क्यानाडासँगै क्रोएशियाको पनि भ्रमणमा जाने कार्यक्रम छ ।