काठमाडौं– बेरोजगार युवायुवतीहरूलाई आकर्षक तलबको प्रलोभनमा पारी रोजगारीका लागि विभिन्न देशहरूमा लैजाने भन्दै लामो समयसम्म झुक्याएर नपठाएको आरोपमा दुई जना पक्राउ परेका छन् । पक्राउ पर्नेमा लमजुङ घर भएका २६ वर्षीय दीपेन्द्र गुरुङ र सर्लाही घर भएकी ३४ वर्षीया रुपी माया रहेका छन् । 

दीपेन्द्रले बुसनिया पठाउने भन्दै ६ जना पीडितहरूबाट सात लाख रुपैयाँ र रुपी मायाले पनि मलेसिया पठाउने भन्दै ६ नै जनाबाट पाँच लाख ५७ हजार रुपैयाँ लिएर सम्पर्कविहीन भएको भनेर पीडितहरूले दिएको जाहेरी अनुसार काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनीहरूलाई पक्राउ गरेको हो । 

उनीहरूमाथि थप अनुसन्धान तथा कारबाहीको लागि वैदेशिक रोजगार विभाग ताहाचल पठाइएको प्रहरीले जनाएको छ ।