काठमाडौं- इरान र अमेरिकाबीच हुने भनिएको आणविक वार्ता अन्तिम समयमा रद्द भएको छ । इरान र इजरायलबीच द्वन्द्व चलिरहँदा इरान र अमेरिकाबीचको आणविक वार्ता अन्तिम समयमा रद्द भएको हो ।

यो वार्ता आइतबार ओमनमा हुने तय गरिएको थियो । यसअघि अमेरिका र इरानबीच विभिन्न चरणमा पटक पटक आणविक वार्ता भएको थियो, जसलाई दुबै पक्षले सकारात्मक रूपमा अर्थ्याउँदै आएका थिए ।

तर, वार्ता जारी रहेको बेला अचानक गत शुक्रबार इजरायलले इरानमाथि हमला गरेको थियो । इजरायली आक्रमणमा इरानका प्रमुख सैन्य कमाण्डरसहित आणविक वैज्ञानिक मारिएसँगै मध्यपूर्व थप अशान्त बन्न पुगेको बेला वार्ता भाँडिएको हो ।

ओमानका विदेशमन्त्री बद्र अल्बुसैदीले सामाजिक सञ्जाल पोस्टमार्फत वार्ता स्थगित भएको जानकारी दिएका हुन् । अल्बुसैदीले अगाडी भने– ‘कूटनीति र संवाद नै दिगो शान्तिको एक मात्र उपाय हो ।’