काठमाडौं– प्रहरीले अमेरिकाको मिनेसोटा राज्यमा डेमोक्र्याटिक जनप्रतिनिधिको हत्यामा संलग्न व्यक्तिको खोजीकार्यलाई तीव्र बनाएको छ । मिनेसोटा प्रहरी र अमेरिकी संघीय जाँचबुझ ब्यूरो (एफबीआई) ले मिनेसोटाका डेमोक्र्याटिक जनप्रतिनिधिलाई गोली हानेर हत्या गर्ने व्यक्तिको खाजीकार्यलाई तीव्र पारेका हुन् ।

शनिबार बन्दुधारीले मिनेसोटा राज्यको संसदमा प्रतिनिधित्व गर्ने डेमोक्र्याटिक प्रतिनिधि एवम् पूर्वसभामुख मेलिसा होर्डम्यान र उनका श्रीमान् मार्कको गोली हानी हत्या गरेको थियो । त्यसैगरी बन्दुकधारीले अर्का डेमोक्र्याटिक प्रतिनिधि जोन होफम्यान र उनकी श्रीमतीलाई पनि गोली हानेको थियो । होफम्यान र उनकी श्रीतमी गोली लागेर घाइते भएको जनाइएको छ ।

मिनेसोटाका गभर्नर एवम् कमला ह्यारिसको निर्वाचन अभियानमा उपराष्ट्रपति पदका उम्मेदवार टिम वाल्जले घटनालाई ‘राजनीतिप्रेरित हत्या’ भनेका छन् । सुरक्षाकर्मीले ५७ वर्षीय भान्स लुथर बोल्टरका रुपमा बन्दुकधारीको पहिचान सार्वजनिक गरेका छन् ।

मिनेसोटा र आसपासका राज्यमा उनको खोजीकार्यलाई तीव्र पारिएको समाचार संस्था रोयटर्सले जनाएको छ । सुरक्षाकर्मीले संदिग्ध बन्दुकधारी चढेको कारमा ‘घोषणापत्र’ फेला पारेका छन् । उक्त घोषणापत्रमा उनले अन्य राजनीतिक नेता एवम् संस्थाहरुको ७० भन्दा धेरै नामको सूची तयार पारेको जनाइएको छ ।

उक्त सूचीमा वाल्जसहित डेमोक्र्याटिक पार्टीका तर्फबाट अमेरिकाको तल्लो सदन हाउस अफ रिप्रेजेन्टेटिभमा मिनेसोटा राज्यकी प्रतिनिधि इल्हान ओमर, सिनेटर टिना स्मिथ र मिनेसोटाका महान्यायाधीवक्ता किथ एलिसन समेत रहेको रोयटर्सले उल्लेख गरेको छ ।