काठमाडौं– शुक्रबार सबेरै इजरायलले इरानी भूमिलाई लक्षित गरी सैन्य कारवाही गरेको छ । इजरायलले इरानको सैन्य एवम् आणविक पूर्वाधारलाई लक्षित गरी आक्रमण गरिएको जनाएको छ ।

इजरायली आक्रमणमा इरानका वरिष्ठ सैन्य अधिकारीसहित आणविक वैज्ञानिक पनि मारिएका छन् । इरानले आक्रमणको बदला लिने चेतवानी दिएको छ ।

अहिले अमेरिकाले इरानसँग नयाँ आणविक सम्झौता गर्न वार्ता गरिरहेको छ । यस्तो अवस्थामा इजरायलले गरेको आक्रमणबारे अमेरिकाले संयमित प्रतिक्रिया दिएको छ ।

अमेरिकी राष्ट्रपति डोनाल्ड ट्रम्पले इरानमाथि आक्रमण गर्ने विषयमा अमेरिकाको कुनै संलग्नता नरहेको प्रष्ट पारेका छन् । अमेरिकाको फक्स न्यूजसँगको कुराकानीका क्रममा राष्ट्रपति ट्रम्पले इजरायली आक्रमणमा अमेरिकाको कुनै संलग्नता नरहेको बताएका हुन् ।

इरानले आणविक बम प्राप्त गर्न नहुने अडानमा अमेरिका अझै दृढ रहेको उनको भनाइ छ । इरानले प्रतिकार गरे अमेरिकाले इजरायलले सहयोग गर्ने पनि राष्ट्रपति ट्रम्पले उल्लेख गरे ।

उनले शुक्रबार बिहान राष्ट्रिय सुरक्षा परिषदको बैठक डाक्ने अपेक्षा गरिएको छ । अमेरिकी विदेशमन्त्री मार्को रुबियोले पनि इजरायली आक्रमणमा अमेरिकी संलग्नता नरहेको बताएका छन् ।

विज्ञप्ति जारी गर्दै उनले सो क्षेत्रमा रहेका अमेरिकी सैनिकको सुरक्षा आफ्नो प्राथमिकतामा रहेको बताए । अमेरिकी हित वा व्यक्तिहरुलाई लक्षित गरी आक्रमण नगर्न पनि उनले इरानलाई चेतावनी दिएका छन् ।