काठमाडौं– भारत र अष्ट्रेलियाले रक्षा सहकार्यलाई मजबुत बनाउँदै लैजाने प्रतिबद्धता व्यक्त गरेका छन् । भारतको राजधानी नयाँ दिल्लीमा सम्पन्न दुवै मुलुकका रक्षामन्त्रीको बैठकमा यस्तो सहमती भएको हो ।

भारतीय समचार संस्था एएनआईका अनुसार बैठकमा भारतीय रक्षामन्त्री राजनाथ सिंह र उनका अष्ट्रेलियन समकक्षी रिचर्ड मार्लेस सहभागी थिए । उनीहरुले रक्षा सहकार्यलाई मजबुत बनाउँदै आतंकवादविरुद्ध एकजुट हुने प्रतिबद्धता जनाएको एएनआईले उल्लेख गरेको छ ।

बैठकका क्रममा मन्त्री सिंहले द्विपक्षीय रणनीतिक साझेदारी विस्तार हुँदै गइरहेको बताएका थिए । उनले जम्मु कश्मीरको पहलगाम क्षेत्रमा २६ जनाको ज्यान जानेगरी भएको आतंककारी आक्रमणपछि भारतलाई गरेको सहयोगप्रति अष्ट्रेलियालाई धन्यवाद समेत दिएका थिए ।

मन्त्री सिंहले पछिल्लो तीन वर्षमा दुई मुलुकको रक्षा सहकार्य थप विस्तार हुँदै गइरहेको बताएका थिए । जवाफमा अष्ट्रेलियाका मन्त्री मार्लेसले भारतसँग सहकार्य गर्न आफ्नो मुलुक प्रतिबद्ध रहेको जनाएका थिए ।