काठमाडौं – कृषा चौलागाई निर्देशित फिल्म ‘पिताम्बर’ले प्रदर्शनको ५१ दिन मनाएको छ । गत चैत २९ बाट प्रदर्शनमा आएको यस फिल्मले रञ्जना हल र विग मुभिजमा ५१ दिन मनाएको हो ।

रञ्जना हलमा एक कार्यक्रमको आयोजना गरी निर्माण पक्षले यस सफताको खुशी मनाएको छ । उक्त कार्यक्रममा फिल्मका शीर्ष कलाकार सौगात मल्ल, प्रमोद अग्रहरी र अनुपविक्रम शाही उपस्थित थिए ।

फिल्मका मुख्य नायक प्रदीप खड्का, नायिकाहरु सुपुष्पा भट्ट र दिव्या भने कार्यव्यस्तताले अनुपस्थित रहे ।

उक्त कार्यक्रममा निर्देशक कृषाले भने यस फिल्मको सिक्वेल ‘पिताम्बर २’ निर्माण गर्ने घोषणा गरिन् । भनिन्, ‘पिताम्बरको गल्ती सच्याउँदै यसको सिक्वेल निर्माण गर्नेछु ।’

सिक्वेलमा ‘पिताम्बर’का कुन–कुन कलाकार दोहोरिन्छ यसबारे भने केही बताइएको छैन ।

‘पिताम्बर’ मल्टिस्टार फिल्म र प्रचारले हाइप बटुले पनि व्यावसायिक रुपमा भने उत्कृष्ट रहन सकेन । यस फिल्मको ग्रस कलेक्सन ५ करोडभन्दा कम नै रहेको बुझिएको छ ।

यो फिल्मले कृषालाई भने चर्चामा ल्याएको छ । उनलाई यसले स्थापित निर्देशक बनाएको छ ।