काठमाडौं – सन् २०१४ डिसेम्बरमा बलिउड नायक आमिर खान स्टारर फिल्म ‘पीके’ प्रदर्शनमा आएको थियो ।

यो फिल्मले प्रदर्शनमा आएपछि विभिन्न कोणबाट चर्चा पायो । कसैले यो फिल्मलाई धर्मविरोधी भने । कसैले फिल्मको प्रशंसा गरे ।

फिल्मप्रेमीको बहसको कुरा भने अर्कै थियो । उनीहरुको अनुमान थियो- ‘पीके-२’मा नायक रणवीर कपुर मुख्य भूमिकामा हुनेछन् ।

फिल्मको अन्त्यमा रणवीरको प्रवेश भएको थियो । एलियनको भूमिकामा रहेका रणवीरलाई आमिर खानले पृथ्वीमा घुम्न ल्याएका थिए ।

प्राय: हिट फिल्मको सिक्वेल बन्ने गर्छन् । यसरी स्टार कलाकार फिल्मको अन्त्यमा देखिनु भनेको सिक्वेलको लागि नायक तय भइसकेको सन्देश दिन लागेको बुझिन्छ ।

त्यसैले रणवीर ‘पीके’को सिक्वेलमा शीर्ष भूमिकामा देखिन्छ भन्ने चर्चा चलेको हो । फिल्म प्रदर्शनमा आएको एक दशकपछि यसको सिक्वेलको बन्ने पक्का भएको छ ।

अहिले ‘पीके’का निर्देशक राजकुमार हिरानी, नायक अमिर खान र लेखक अभिजित जोशी सिक्वेलको काममा सक्रिय भएर लागिपरेको खबर बाहिरिएको छ ।

भारतीय मिडिया टाइम्स अफ इन्डियाले सिक्वेलमा रणवीर शीर्ष कलाकारका रुपमा देखिने उल्लेख गरेको छ । उनी एलियनकै भूमिकामा देखिने बताइएको छ । सिक्वेलमा आमिर पनि दोहोरिने छन् ।

रणवीर अहिले ठूला ब्यानारका फिल्ममा काम गरिरहेका छन् । उनको पाइपलाइनमा फिल्महरु टन्नै छन् ।

उनको अभिनय रहेको फिल्म ‘रामायण’ सन् २०२६ को दिपावलीमा प्रदर्शनमा आउँदै छ । यसको छायाङ्कन सकिए पनि उनले प्रचारका लागि समय निकाल्नु पर्ने हुन्छ ।

रणवीर ‘धुम-४’ मा पनि अनुबन्ध भइसकेको खबर बाहिरिएको छ । यसको छायाङ्कन पनि चाँडै हुने चर्चा छ । उनी ‘एनिमल’को सिक्वेल ‘एनिमल पार्क’मा पनि अनुबन्ध भइसकेको बताइएको छ ।

यी पाइपलाइमा रहेका फिल्मको काम सकेरै मात्र रणवीर ‘पीके-२’को छायाङ्कनमा सहभागी हुने चर्चा छ ।