काठमाडौं – ‘पूर्णबहादुरको सारङ्गी’ निर्माता मध्येका एक विनोद पौडेलको नयाँ फिल्म ‘अभिमन्यु’ भदौ २७ गते प्रदर्शनमा आउँदैछ । यो फिल्म प्रदर्शनमा आउन बिहीबारबाट ९९ दिन बाँकी छ ।

सय दिने काउन्ट डाउन सुरु गर्नु भनेको प्रचारका लागि प्रयाप्त समय छुट्याउनु हो । सामान्यतया अहिले फिल्म प्रदर्शनको एक महिनाअघि मात्रै प्रचार गरिन्छ । बढी फिल्मले १५ दिने ‘काउन्ट डाउन’ प्रचार शैली अपनाएको अभ्यास छ ।

अहिले ‘नेपाली फिल्मको प्रचार नै कमसल छ’ भन्ने भाष्य निर्माण भइरहेको छ । प्रचारको त कुरै छाडौं प्रिमियरको दिन पनि फिल्मको सम्पादन पूरा भएको हुँदैन । अनि सम्पादन र प्रचार एकचोटी कसरी अगाडि बढोस् ?

तर, निर्माता पौडेलले सय दिने ‘काउन्ट डाउन’ सुरु गरेर प्रचारका लागि राम्रै रणनीति बनाएको सन्देश दिएका छन् । उनी आफैँ पनि प्रदर्शनको दुई महिना अघिदेखि राम्रै प्रचारमा जुट्ने योजनामा छन् ।

यो काउन्ड डाउनलाई उनले प्रचारको ‘वार्मअप’का रुपमा लिएका छन् । यसरी प्रचारका लागि राम्रै छुट्याउने कारणबारे उनले खबरहबसँग सेयर गरेका छन् । ‘क्राइम, सम्पेन्स थ्रिलर’ जनरामा ‘अभिमन्यु’ बनेकाले प्रचारमा बढी खट्ने निर्णयमा आफू पुगेको उनले बताए ।

उनी स्पष्ट पार्छन्, ‘यस जनरामा नयाँ मेकरले मात्रै अभ्यास गर्छन् । उनीहरुले पनि यसलाई निरन्तरता दिँदैनन् र कम्फर्ट जनरामा जान्छन् । दर्शकलाई मेकहरु असफल भएको जनरा क्राइम, सम्पेन्स थ्रिलर लाग्न थालेको छ । सोहीकारण हामीले दर्शकले विश्वास जित्न लामो समय प्रचारका लागि छुट्याएका हौं ।’

‘काउन्ट डाउन’ सुरु गर्न निर्माण पक्षले फस्र्टलुक पोस्टर सार्वजनिक गरेको छ । पोस्टर तराईको सेटअपमा छ । धानबारी र केराघारीलाई पृष्ठभूमी बनाएर एक किशोरले एक बालिकालाई काखीमा च्यापेर बोकेका छन् । ती बालिकाले सरकारी विद्यालयको पोसाक लगाएकी छन् ।

अर्थात्, पोस्टरमा अनुबन्ध गर्दा शीर्ष भनिएका कलकारहरुलाई राखिएको छैन । फिल्मको शीर्ष भूमिकामा नायिकाहरु सरिता गिरी, गौमाया गुरुङ, लक्ष्मी बर्देबा र नायक कामेश्वर चौरासिया रहेको बताइएको छ ।

‘सेभेन सिज’ ब्यानारमा निर्माण भएको यस फिल्मको निर्देशक सुशान्त गौतम हुन् । उनको यो डेब्यू फिल्म हो । फिल्मको लेखक मुकेश खनाल हुन् । पौडेल र गुञ्जन गिरीको फिल्ममा लगानी रहेको छ ।