काठमाडौं– नेकपा एमालेबाट चोइटिएर बनेको नयाँ पार्टी नेकपा एकीकृत समाजवादीले दुई दिनको अन्तरालमा दुई धक्का ब्यहोर्नु परेको छ ।

नेकपा एमालेका अध्यक्ष केपी शर्मा ओलीले सत्ताको नेतृत्व गरिरहेका बेला एकीकृत समाजवादीले सोमबार र बिहीबार दुईवटा धक्का पाएको हो ।

अख्तियार दुरुपयोग अनुसन्धान आयोगले एकीकृत समाजवादीका अध्यक्ष एवम् पूर्वप्रधानमन्त्री माधवकुमार नेपालविरुद्ध बिहीबार १८ करोड ५८ लाखको भ्रष्टाचार मुद्दा चलाएको छ ।

उता समाजवादीबाटै सुदूरपश्चिम प्रदेशको मुख्यमन्त्री बनिसकेका दीर्घ सोडारीविरुद्ध पनि यसअघि सोमबार विशेष अदालतमा भ्रष्टाचार मुद्दा दायर भएको छ ।

अख्तियारले ‘पतञ्जलि जग्गा खरिद–बिक्री प्रकरण’ मा पूर्वप्रधानमन्त्री नेपालसहित ९३ जनाविरुद्ध भ्रष्टाचार मुद्दा चलाएको हो ।

उता सुदूरपश्चिमका पूर्वमुख्यमन्त्री सोडरीविरुद्ध पदमा रहँदा अकूत सम्पत्ति आर्जन गरेको भन्दै विशेष अदालतमा भ्रष्टाचार मुद्दा दायर गरेको हो ।

अख्तियारले पूर्वप्रधानमन्त्री नेपालविरुद्ध दायर गरेको मुद्दामा १८ करोड ५८ लाख ५० हजार रुपैयाँ बिगो कायम गरिएको छ । यस्तै सोडरीविरुद्ध दायर गरिएको मुद्दामा एक करोड आठ लाख ३८ हजार ३०२ रुपैयाँ बिगो कायम गरिएको छ ।

सोडारीले पदमा रहँदा एक करोड ९३ लाख ८९ हजार ६३७ रुपैयाँ बराबरको सम्पत्ति आर्जन गरेको भेटिएकामा ८५ लाख ५१ हजार ३३४ रुपैयाँ मात्रै वैध आय पुष्टि भएको अख्तियारले जनाएको छ ।

जसमा एक करोड ८ लाख ३८ हजार ३०२ रुपैयाँ बराबरको सम्पत्तिको स्रोत नखुलेको रकमलाई नै बिगो कायम गरी मुद्दा दायर गरिएको अख्तियारले जनाएको छ।