पोखरा – पोखरा विश्वविद्यालय कार्यकारी परिषद्को बैठकले विभिन्न संकायका डिन तथा परीक्षा नियन्त्रक नियुक्त गरेको छ ।

कार्यकारी परिषद्को मंगलबार भएको बैठकको निर्णय अनुसार पोखरा विश्वविद्यालय ऐन, २०५३ को दफा २७ (३) बमोजिम विभिन्न निर्णय गरिएको हो ।

स्कुल अफ हेल्थ एन्ड एलाइड साइन्सेजका प्राडा विष्णुराज तिवारीलाई स्वास्थ्य विज्ञान संकायको डिन नियुक्त गरिएको छ । कार्यकारी परिषद्ले पोखरा विश्वविद्यालय स्कुल अफ इन्जिनियरिङका सहप्राध्यापक ई। बुद्धिराज जोशीलाई विज्ञान तथा प्रविधि संकायको डिन र स्कुल अफ डेभलपमेन्ट एन्ड सोसल इन्जिनियरिङका उपप्राध्यापक डा सुरेन्द्र तिवारीलाई मानविकी तथा सामाजिक शास्त्र संकायको डिन पदमा नियुक्त गरेको हो ।

सोही बैठकले पोखरा विश्वविद्यालय स्कुल अफ हेल्थ एन्ड एलाइड साइन्सेजका उपप्राध्यापक राजु पाण्डेयलाई पोखरा विश्वविद्यालय पदाधिकारीको काम, कर्तव्य र अधिकारसम्बन्धी नियमावली, २०५५ को नियम १५ (३) बमोजिम परीक्षा नियन्त्रक पदमा नियुक्त गरेको छ ।

नियुक्त भएका सबैको कार्यकाल चार वर्ष छ । नवनियुक्त पदाधिकारीलाई पोखरा विश्वविद्यालयको उपकुलपति कार्यालयमा बुधबार आयोजित समारोहबीच उपकुलपति प्राडा वेदराज केसीले पद तथा गोपनीयताको शपथ गराएका छन् ।