काठमाडौं– अखिल नेपाल फुटबल संघ (एन्फा)ले हङकङसँग अन्तराष्ट्रिय मैत्रिपूर्ण खेल खेल्न जाने नेपाली राष्ट्रिय पुरुष फुटबल टिमको बिदाइ गरेको छ । 

सोमबार एन्फा कम्प्लेक्स सातदोबाटोमा खेलकुदमन्त्री तेजुलाल चौधरी लगायत एन्फा पदाधिकारीले नेपाली राष्ट्रिय पुरुष फुटबल टिमको बिदाइ गरेका हुन् ।

नेपालले यही जुन ५ मा हङकङसँग उसकै घरेलु मैदानमा मैत्रीपूर्ण खेल खेल्ने छ भने त्यसपछि एएफसी एसियन कप छनोट अन्तर्गत लाओससँग जुन १० मा उसैको घरेलु मैदानमा नेपालले खेल खेल्नेछ ।

बिदाइ कार्यक्रममा खेलकुदमन्त्री चौधरीले नेपाली टोलीसँग राष्ट्रले गरेका आशालाई पुरा गर्नका लागि उच्च मनोबलका साथ मैदान उत्रन आग्रह गरे । उनले खेलाडीको विकासका लागि सरकारले पहिलो तुलनामा बजेट बढाउँदै लगेको जानकारी दिए । 

खेल र खेलाडीको विकासका लागि सरकार सदैव गम्भीर रहेको मन्त्री चौधरीले बताए । सोमबारै एन्फाले ले २३ सदस्यीय नेपाली राष्ट्रिय फुटबल टिमको घोषणा गरेको थियो ।