काठमाडौं- आगामी दशैंको प्राइम रिलिज डेट उपभोग गर्ने यो वर्ष नलाग्दै फिल्मका प्रदर्शन मिति तोक्न थालिएको थियो ।

आजको मितिसम्म आइपुग्दा पाँच फिल्मले फूलपातीलाई प्रदर्शन मिति तोकेका छन् । फिल्म ‘जारी २’ को छायाङ्कन भइरहेको छ । यसका निर्माता रामबाबु गुरुङ पनि दशैंमै फिल्म प्रदर्शन गर्ने सोचमा रहेको बुझिएको छ ।

दुईभन्दा बढी फिल्म प्रदर्शनमा आए शो बाँडफाटँमा समस्या हुन्छ । फिल्म बजार जानकारहरु पनि दुईभन्दा बढी फिल्म एक साथ हलमा लाग्दा शो व्यवस्थापनमा समस्या हुने बताउँछन् ।

तर, निर्माता रोहित अधिकारी एक मात्रै शो पाए पनि आफ्नो फिल्म ‘माइतीघर’ फूलपातीमै प्रदर्शनमा ल्याउने दाबी गरिरहेका छन् । ‘माइतीघर’ बारे उनी भन्छन्, ‘प्रदर्शन मिति फूलपातीबाट एक इन्च तलमाथि नहुने फिल्म हो ।’

यस फिल्ममा कलकारक केदार घिमिरे, नायक धिरज मगर, गायक प्रकाश सपुत, नायिकाहरू उपासना र श्यामश्री शीर्ष भूमिकामा रहेका छन् ।

यो फिल्मको छायाङ्कन पूरा भएको निर्माता रोहित अधिकारीले बताएका छन् । ३२ दिनमा यस फिल्मको छायाङ्कन पूरा भएको हो । दुई गीतको भिडियोको छायाङ्कन बाँकी राखेर फिल्मको इन्ड क्ल्याप गरिएको हो ।

निर्देशक मिलन तामाङ वैशाख तेस्रो साताबाट ४० दि‍नको तालिका लिएर छायाङ्कनमा निस्किएका थिए । अनुमान गरिएको भन्दा एक साताअघि नै छायाङ्कन सकिएको हो ।

निर्माता अधिकारीका अनुसार यस फिल्मको छायाङ्कन गुल्मीको ताकम गाउँ र धारापानीमा भएको बताइएको छ ।

मिलन तामाङको निर्देशनमा बनेको यस फिल्ममा चन्द्रबहादुर दोङको कथा र रामशरण पाठकको पटकथा तथा संवाद रहेको छ ।

रोहित अधिकारी फिल्मसको ब्यानरमा बन्ने यस फिल्मको निर्माताहरु रोहित अधिकारी, रविन शेरचन र धीरज तामाङ हुन् ।