काठमाडौं – यो वर्षको पहिलो हिट फिल्म ‘ऊनको स्वीटर’ चौथो सातामा प्रदर्शनरत छ । वैशाख २६ बाट प्रदर्शनमा आएको यो फिल्म गत शुक्रबारबाट चौथो सातामा प्रवेश गरेको छ ।

यो फिल्मलाई देशकै ठूलो मल्टिप्लेक्स चेन ‘क्यूएफएक्स’ले सुपरहिटको मान्यता दिएको छ । यो फिल्मको अकुपेन्सी राम्रो छ भन्ने उदाहरण हो ।

योसँगै सोही मितिमा फिल्म ‘जार’ प्रदर्शनमा आएको थियो । जेठ २ गते दुई फिल्म ‘के घर के डेराः घर नम्बर २’ र ‘हेलो काँसीराम’ प्रदर्शनमा आए ।

जेठ ९ मा महानायक राजेश हमालको ‘कमब्याक’ फिल्म ‘नरसिंहा : अभतार’ प्रदर्शनमा आयो । अर्थात्, चार फिल्मसँग हलमा प्रतिस्पर्धा गर्दा पनि यसको अकुपेन्सी उच्च छ ।

फिल्म निर्माण कम्पनी ‘आर्टमाण्डु’ले तेस्रो साताको ग्रस कलेक्सन सार्वजनिक गरेको छ । उसको दाबी अनुसार फिल्मले यो अवधिमा १० करोड ५ लाखको व्यापार गरेको छ ।

आर्टमाण्डुका अनुसार यो फिल्मले तेस्रो सातामा मात्रै एक करोड ९० लाखको ग्रस कलेक्सन गरेको छ । यो फिल्मले पहिलो साता पाँच करोड ७५ लाख र दोस्रो साता २ करोड ३५ लाख ग्रस कलेक्सन गरेको थियो ।

अर्थात् पहिलो साताको तुलनामा दोस्रोमा यसको ग्रस कलेक्सन तीन करोड ४० लाखले घटेको छ । दोस्रो साताको तुलनामा तेस्रो साता ४५ लाखले घटेको छ ।

तथापि तेस्रो सातामा उक्त रकम बराबरको ग्रस कलेक्सन हुनुलाई राम्रो अकुपेन्सी मानिन्छ । यो दर्शकले फिल्म मन पराएको उदाहरण पनि हो ।

फिल्ममा नायक विपीन कार्की र मिरुना मगर शीर्ष भूमिकामा छन् । फिल्मको निर्देशक र लेखक नवीन चौहान हुन् । उनको यो डेब्यू फिल्म हो ।