काठमाडौं – बलिउड फिल्म ‘हेराफेरी’ को सिक्वेल ‘हेराफेरी ३’ बन्ने चर्चाले दर्शक खुसी थिए । यस सिक्वेलका शीर्ष कलाकार परेश रावलले फिल्मबाट बाहिरिने निर्णय लिएपछि दर्शकको खुसी धेरै समय टिकेन ।

परेश फिल्ममा ‘बाबु भैया’ को भूमिकामा थिए । यो पात्र नभए सिक्वेल नै राम्रो बन्दैन भन्ने दर्शकहरूले प्रतिक्रिया दिइरहेका छन् ।

अर्कोतर्फ परेशले फिल्मबाट बाहिरिने निर्णय लिएपछि निर्माण पक्ष अन्योलमा छ । फिल्म बन्ने हो कि नबन्ने हो भन्ने अवस्था सिर्जना भएको छ ।

परेशको बहिर्गमन उनी आफैँलाई तनावको विषय बनेको छ । एक त उनी कानुनी झमेलामा पर्नुपर्‍यो । फिल्मका निर्माता र कलाकार समेत रहेको अक्षय कुमारले उनलाई ‘लिगल नोटिस’ पठाएका थिए ।

ब्याजसहित ‘साइनिङ अमाउन्ट’ फिर्ता गरेर कानुनी झमेला उनले आफ्नो तर्फबाट सके ।

अर्कोतर्फ उनलाई अहिले सबैभन्दा बढी सोधिने प्रश्न बनेको छ- ‘हेरा फेरीबाटको बहिर्गमनको कारण के हो ?’ उनले यो विषयमा कुरा गर्न नचाहे पनि गर्नै पर्ने बाध्यता बनेको छ ।

सोहीकारण उनले ‘द लल्लनटप’ सँगको कुराकानीमा भनेका छन्, ‘अब बाबु रावको भूमिका मेरो लागि घाँटीको पासोजस्तो भएको छ । म स्वतन्त्र हुन चाहन्छु ।’

उनी ‘बाबु भैया’ को भूमिकासँग वाक्क बन्नुको कारण अर्को पनि छ । उनका अनुसार मेकरहरू बावु भैयाकै जस्तो भूमिकाका लागि प्रस्ताव लिएर आउँदा उनी हैरान छन् ।

प्रस्ताव आउन सुरु भएको ‘हेरा फेरी’ प्रदर्शनमा आएपछि नै हो । अर्थात् दशकअघि देखि नै उनलाई ‘बावु राव’ को जस्तै भूमिकाका लागि प्रस्ताव आइरहेका छन् । कलाकारका रूपमा उनलाई ‘बावु राव’ जस्तै भूमिकामा सीमित हुन मन छैन ।

उनी भन्छन्, ‘जो पनि मसँग काम गर्न आउँछन्, उनीहरूको दिमागमा बाबु रावकै छाप हुन्छ । म कलाकार हुँ । म एउटै भूमिकामा अड्किएर बस्न चाहन्नँ ।’

बाबु रावसँग सम्बन्धित प्रश्न र काम आउँदा आफूलाई असहज भइरहेको उनले बताए । भन्छन्, ‘मलाई योबाट मुक्ति चाहिएको छ ।’