काठमाडौं– युक्रेनले रुसी हवाइअड्डालाई लक्षित गरी व्यापक आक्रमण गरेको जनाएको छ । युक्रेनी सुरक्षा सेवा एसबीयूले रुसका विभिन्न सैन्य विमानस्थललाई लक्षित गरी व्यापक ड्रोन आक्रमण गरेको दाबी गरेको हो ।

ड्रोन आक्रमणका क्रममा ४० भन्दा धेरै रुसी बमवर्षक विमान क्षतिग्रस्त भएको एसबीयूले दाबी गरेको छ । किभ इन्डिपेन्डेन्टका अनुसार एसबीयूले रुसी विमानस्थलमा रहेका ‘रणनीतिक बमवर्षक विमान’ लाई लक्षित गरी ड्रोन आक्रमण गरिएको हो ।

घटनाबारे रुसी पक्षबाट कुनै टिप्पणी सार्वजनिक भइसकेको छैन । ध्वस्त भएका रुसी रणनीतिक विमानमा ए–५०, टीयू–९५ र टीयू–२२ एम३ रहेको स्रोतलाई उद्धृत गर्दै किभ इन्डिपेन्डेन्टले उल्लेख गरेको छ ।

समाचारमा जनाइएअनुसार युक्रेनले मंगोलियासँग सीमा जोडिएको साइबेरियाको इर्कुत्स्क ओब्लास्टमा रहेको बेलाया हवाई अड्डामा पनि आक्रमण गरेको छ ।

इर्कुत्स्कका गभर्नर इगोर कोभजेभले स्रेड्नी गाउँमा रहेको सैन्य एकाइमा ड्रोन आक्रमण भएको पुष्टि गरेको उक्त समाचार संस्थाले दाबी गरेको छ । इर्कुत्स्क ओब्लास्ट युक्रेनसँगको सीमाबाट ४ हजार किलोमिटर टाढा पर्छ ।

त्यसैगरी, युक्रेनले रुसको मुर्मान्स्कमा पनि आक्रमण गरेको जनाइएको छ । मुर्मान्स्क युक्रेनी सीमाबाट झण्डै २ हजार किलोमिटर उत्तरमा पर्छ ।