काठमाडौं- राजावादीहरूले जेठ १५ गतेदेखि थालेको आन्दोलन जारी छ । आइतबार तेस्रो दिन राजावादीहरूको संयुक्त आन्दोलन समितिको नेतृत्वमा नारायण चौरबाट जुलुस थालिएको छ ।

नारायण चौरबाट प्रधानमन्त्रीको सरकारी निवास बालुवाटार क्षेत्र घेर्ने योजनासहित राजावादीहरू अघि बढ्न खोजेका छन् । तर उनीहरूलाई नारायण चौरमा तैनाथ प्रहरीले रोकेको छ ।

नारायण चौरमा प्रहरीसँग राजावादीको केहीबेर धकेलाधकेल पनि चलेको छ । नारायण चौरको सभामा राष्ट्रिय प्रजातन्त्र पार्टीका अध्यक्ष राजेन्द्र लिङदेनले सम्बोधन गरे।

उनले आफूहरू स्थानीय प्रशासनले निषेधाज्ञा लगाएको क्षेत्रमा नजाने बताएका छन् । तर प्रहरीले बल प्रयोग गर्न खोजेमा प्रतिकारमा उत्रिने चेतावनी उनले दिएका छन् ।

उनले आइतबार निषेधित क्षेत्र तोड्ने योजना नबनाएको बताउँदै नियन्त्रण गर्न खोजिए प्रतिकार गर्ने उल्लेख गरे । ‘हामीलाई तपाईंहरूले नियन्त्रण यता जानु, उता नजानु भन्ने हो भने हामी प्रतिकार थाल्छौँ ।’

उनले आफूहरू कुनै किसिमको मुठभेटको पक्षमा नरहेको पनि बताएका छन् । उनले निषेधित क्षेत्र नतोडे पनि त्यस क्षेत्रसम्म आफूहरूलाई जान दिनुपर्ने अडान राखेका छन् ।