काठमाडौं – १३ औं दक्षिण एसियाली खेलकुद (साग) को बन्द प्रशिक्षणमा रहेका खेलाडीले पाँच दिन बिदा पाउने भएका छन् ।

राष्ट्रिय खेलकुद परिषद् (राखेप) ले बन्द प्रशिक्षणमा रहेका खेलाडीलाई पाँच दिनको दशैं बिदा दिने तयारी गरेको राष्ट्रिय टोली छनोट समितिका संयोजक महेन्द्र कुमार राईले बताए ।

राखेपले असोज १९ देखि २३ गतेसम्म दशैं बिदा दिने तयारी गरिरहेको राईले बताए ।

‘नेपालीहरुको महान चाड दशैं भएकाले हामीले बन्द प्रशिक्षणमा रहेका खेलाडीलाई पाँच दिनको बिदा दिन राखेपसँग माग गरेका छौं,’ राईले भने,‘हामीले १९ गते आइतबारदेखि बिदा दिने तयारीसहित राखेपमा पत्र पठाएका छौं ।’

बिदाबारे सदस्यसचिव रमेश कुमार सिलवालसँग कुरा भइसकेको बताए । उनले छिट्टै बिदा स्वीकृत हुने बताएका हुन् ।

साग आगामी मंसिर १५ देखि २४ गतेसम्म काठमाडौं र पोखरामा आयोजना हुँदैछ । सागमा २७ खेल समावेश गरिएका छन् ।