काठमाडौं – युइएफए च्याम्पियनसिपको उपाधिका लागि फ्रेन्च क्लब पेरिस सेन्टजर्मेन (पिएसजी) र इटालियन क्लब इन्टर मिलानबीच आज प्रतिस्पर्धा हुँदै छ । नेपाली समयअनुसार राति १२ः४५ बजे दुई टोलीबीचको उपाधि भिडन्त सुरु हुनेछ ।

युरोपेली फुटबलको सबैभन्दा प्रतिष्ठित प्रतियोगिता च्याम्पियन लिगको फाइनल जर्मनीको म्युनिख एलियान्ज एरिनामा हुनेछ ।

यसअघि नकआउट चरणमा लिभरपुललाई हराउँदै पिएसजीले फाइनलमा स्थान सुरक्षित गरेको थियो ।पिएसजी यसअघि २०२० मा फाइनल पुगेको थियो । त्यसबेला फाइनलमा बायर्न म्युनिखसँग पराजित भएको पिएसजीले उपविजेतामा चित्त बुझाउनु परेको थियो । यसपटक प्रशिक्षक लुइस एनरिकको नेतृत्वमा रहेको टोलीले लिग १ र फ्रेन्च कप जित्दै उत्कृष्ट प्रदर्शन गरेको छ।

च्याम्पियन्स लिगको यात्रामा पिएसजीले लिभरपुल, एस्टन भिला, र आर्सनल जस्ता सशक्त मानिएका टोलीलाई पराजित गरेका थियो । यो उपाधि जितेमा पिएसजीको पहिलो युरोपेली च्याम्पियन्स लिग उपाधि हुनेछ।

यस्तै इन्टर मिलानले यसअघि तीन पटक (१९६४, १९६५, २०१०) च्याम्पियन्स लिग जितेको छ। यसपटक, प्रशिक्षक सिमोने इन्जाघीको नेतृत्वमा, इन्टरले फेएनोर्ड, बायर्न म्युनिख, र बार्सिलोनालाई पराजित गर्दै फाइनलमा प्रवेश गरेको हो। सेमिफाइनलमा बार्सिलोनासँग ६–६ को समग्र स्कोरपछि अतिरिक्त समयमा डाभिडे फ्राट्टेसीको गोलले इन्टरलाई फाइनलमा पुर्‍याएको थियो।