काठमाडौं – राउटे युवतीसँग गुडिरहेको ट्रकमा गलत नियतसहित दुर्व्यवहारपूर्ण भिडियो खिचेको आरोपमा प्रहरीले एक जनालाई पक्राउ गरेको छ ।

घटनामा संलग्न रहेको भन्दै दैलेखको आठविस नगरपालिका–३, का तपेन्द्र शाहीलाई दैलेख प्रहरीले पक्राउ गरेको हो । थप अनुसन्धानका लागि शाहीलाई दैलेख प्रहरीले सुर्खेत प्रहरीको जिम्मा लगाएको छ ।

केही दिन अघि सर्वाजनिक राउटे युवतीलाई गलत नियतसहित दुर्व्यवहार गरेको भिडियो सामाजिक सञ्जालमा भाइरल छ । भिडियोमा चारजना राउटे युवतीका बीचमा बसेका शाहीले उनीहरुमाथि दुर्व्यवहार गरेको देख्न सकिन्छ । उनीसँग बस्न राउटे युवतीहरुले असहज मानिरहेका छन् । भिडियोमा शाहीले युवतीहरुलाई अंगालो हालेर दुर्व्यवहारपूर्ण शब्द बोलेको छन् । १५ सकेन्ड लामो उक्त भिडियोको अहिले आलोचना भइरहेको छ ।

भिडियो सार्वजनिकपछि राउटे समुदायको हकहितका लागि काम गर्दै आइरहेको सोसक नेपालले सुर्खेत प्रहरीमा उजुरी दिएको थियो । उक्त उजुरीको आधारमा भिडियोमा देखिएका शाही पक्राउ परेका हुन् ।

उनीमाथि साइबर अपरात र दुर्व्यवहार मुद्दामा अनुसन्धान अघि बढाएको सुर्खेत प्रहरीले जनाएको छ ।