काठमाडौं– भारतको तल्लो सदन लोकसभाका सांसद शशी थरुरले पानामालाई आफ्नो मुलुक आतंकवादका विरुद्धमा अडिग रहेको जानकारी दिएका छन् । भारतले पाकिस्तानी भूमिमा रहेका आतंककारी पूर्वाधारलाई लक्षित गरी अपरेशन सिन्दुर सञ्चालन गरेको विषयमा जानकारी दिन हाल उनीसहित सांसदहरु अमेरिकी महादेशको भ्रमणमा छन् ।

उनले पानामाको संंसदका अध्यक्ष डाना कास्टानेडालाई आतंकवादविरुद्ध आफ्नो मुलुकको अडानबारे जानकारी दिएका हुन् । भारतीय समाचार संस्था एएनआईका अनुसार उनले अध्यक्ष कास्टानेडालाई आफ्नो मुलुकले युद्ध नचाहेको पनि जानकारी गराएका छन् ।

उनले युद्ध नचाहेपनि भारतले आतंकवादी गतिविधिलाई सहन गर्न नसक्ने समेत उल्लेख गरेका छन् । भारत प्रशासित जम्मु कश्मीरको पहलगाम क्षेत्रमा २६ जना पर्यटकको ज्यान जानेगरी भएको आतंककारी आक्रमणपछि भारतले पाकिस्तानी भूमिमा रहेका आतंकवादी पूर्वाधारलाई लक्षित गरी आक्रमण गरेको थियो ।

सांसद थरुरसँगको कुराकानीमा अध्यक्ष कान्टानेडाले आतंकवादका विरुद्धमा आफ्नो मुलुकमा कठोर कानुनको प्रबन्ध रहेको जानकारी गराएका थिए ।